Ka Mashitshi Atusseuana : Nipi, Mitshuapa
Ekute petshitinakanit eshi-nishtuapakanit tshekuan, manakaniht Innuat aimunnu tshipa ishinakutauat utatusseunuaua, mitshuapa, aitapashtauna eshi-pimipaniti mak tshe ishinakutaht, eshinakuaki mitshuapa, mak minuat ashit (Ekuanitshit, Unamen Shipu mak Pakua Shipu) Teuat anite kupanieshat ka shatshuapatahk atusseunnu, tshatapatahk tshetshi minuatakannit mak netu-tshissenitak tshetshi minupanit miam eshi-natuenitak tshishe-utshimau. Upime mani utshipanuat kupanieshat ka mitsha-tshissenitahk nenu atusseuna kie ma ka tshissenitak tshe ishnakutakaniti mitshuapa tshematanitaui, eukuanat an tshe taht mani anite etussenanit.
Formation itinérante
At mishue eshinakunnit utatusseun anite innu-assit anite ka taniti Regroupement Mamit Innuat, ne katakuaitshet ka tshitapatak eshi-takuannit atusseunnu uauetashuapatamu mak tshitapatamu shash mitshetupipuna, eshi-uinakanit uin ka patshitinak atusseunnu e atusseshtuat tshishe-utshimaua Ka Aitutuakaniht Innuat ute Kanata-assit (SAC), tshishkutamatsheun ka papamipanit (PFI) tshishkutamatshueu mak shutshiteieshkueu anite atusseunit nenua ka tshitapataminiti 27 innu-assia anite Ushkat Innuat ute ka taht Uepishtikueiau-assit kie, anutshish nishtuait anite tau e minu-uitakanit mak tipan eshinakuannit.
Ka aitutakanit nipi
Ushkat tekuak tshishkutamatsheun, tshetshi aitutakanit nipi (e minnanut nipi kie ma e apashtakanit nip). Anite uet tshitshipanit 2000 tatunnuepipuna katshishkutamatsheshiht ka nishtuapatahk nipinu patshitinimuat tshetshi nashakanit mak tshetshi tshishkutamatshenanut ashit mashinaikana mak tshetshi matshima atusseht anite atusseutshuapit nipi ka aitutakanit. Nenua tshishkutamatsheuna minikuat tshetshi katshitinaht ukanumuaua e nishtuapamakanniti mak e apatishiniti mishue ute Uepishtikueiau-assit. Ashit nenua tshishkutamatsheuna, ka tshishkutamatsheshiht ituteuat anite papeiku innu-assia nishtuau peikupipuna tshetshi shutshiteieshkuaht nenua kaitutasseniti mak nenua atusseuna anite mamu katanannut tiepishkushtakanit atusseuakan, eshi-pimipatakaniti atusseuakana, eshi-nakatuenitakanit mak eshi-uauetashuapatakanit nenua tshekuana ua tshinipinanut. Kie, patshitinimuat upime atusseun e uiashiht atusseuakana tipan ka ishi-nishtuapatakanit tshetshi nanitam takuak mak tshetshi pitshitshipananut nenua netuenitahk ua apashtaht innu-assia.
Tshetshi uitshiakaniht mak tutahk utatusseunuau anitshenat katshishkutamatsheshiht nipinu, ne PFI ashushtau e tshishkutamatishunanut eshinakuak nipi. Mamu kaitusseht anite ishi-nashamuat atusseunnu ne ushkat tshekuan tshe ui tutakanit tshetshi natu-tshissenitakanit nipi ka minnanut anite 27 innu-assia. Ushkat tshi ishi-uapatahk nenu ka natu-tshissenitahk tshetshi nakutuenitahk ne nipi ka utinakanit minekash tshetshi takuak mak tshetshi atshupanit ne kueshtikuak tshetshi matshi-natukuniuet tshetshi katshitaukuht innuat mak ne uashka assia eshinakuak ashit e uitshiaushiht anitshenat ka mamunakaniht utenat. Tutakanu ne atusseun tshetshi uemut minuat ne nipi mak tshetshi minuinniuat innuat anite mamu katanannut.
Eshi-pimutenanut mitshuap e tshitapatakanit
Ne PFI nashamu eshi-pitshitshipanit niakutuenitakanit eshi-pimipanit ne mitshuap ashit anitshenat kutakat katshishkutamatsheshiht shash ka nishtuapatahk nenu atusseunnu. Uetshenat ituteuat anite nenua 27 innu-assia peikuau katshi nanishtupishimua tshetshi uaueshi-tshitapatahk eshi-pimipannit atusseunnu anite nenua mitshuapa innu-assit mak tipan ka itapashtakaniti anite auenitshenat nenu tshipa katshitaukuat (katshishkutamatsheutshuapa, anite ka kanuenimakaniht auassat, tshishenniutshuapa mak akushiutshuapa) tshetshi ut tshimatakanit tshetshi uaueshi-tshitapatakanit tshetshi nakatuenitakanit eshi-pimipanit (PGE). Tshetshi ashit uemut minu-pimipanit, kupaniesh patshitinamu tshishkutamatsheunnu anite e taniti kupaniesha utenat tshetshi aiat pikutaniti mak tshetshi peiku-pimutaitishuniti. Eku, nenua atusseuakana minu-pimipanua, minushtakanua, minu-nakatuenitakanua mak uitshiueua tshetshi etatu minuat uashka inniun e uitakanit anite mitshetuait iapashtakanit.
Akua e aitinanut mak niakutuenitakanit tshetshi eka ishkuatet
Ne PFI kanuenitamu nishtuait uet takuannit atusseunnu, akua tshetshi aitinanut mak tshetshi nakutuenitakanit tshetshi eka ishkuatet. Ne PFI ushkat tshekuannu ka tutak, tshetshi utinat kupaniesha tshetshi nakatuenitaminiti tshetshi eka ishkuatenit. Ne kupaniesh tshika ituteu anite 16 innu-assia ashit nenu atusseunnu ka nakatuenitakannit tshetshi eka ishkuatenit (SSI) mak nenua kutaka 11 innu-assia, anite shash ne tekuak atusseun uetshipanit kakusseshiu-utenat. Ushkat tshekuan ka tutakanit eukuan tshetshi tipishinataikaniti atusseuna, nenua mitshuapa anite ka taht kaiashtuetsheshiht, eshi-atussenanut, atusseuakana mak eshi-taht kupanieshat. Takuanipan tshetshi nakatuenitakanit katshi ne tipishinataitshenanut tshetshi ut eka ishkuatet mak tshetshi ut tshishkutamatshenanut tshetshi ut etatu minutakanit tshe ishi-nakatuenitakanit ne tshe ishi-atussenanut. Nishu katshishkutamatsheshiht uetshipaniht anite katshishkutamatsheutshuapit Uepishtikueiau-assit, kaiashtuetsheshiht utinakanipanat tshetshi tshishkutamuakaniht mak tshetshi ukanumiht, uetinakaniht tshetshi ashtueitsheht mishue anite eshinakuannit tshetshi ashtueitshinannut anite Ushkat Innuat ute ka taht. E tshitapatakaniti nenua atusseuna, ne PFI mekuat tutamu tshetshi takuannit tshetshi atushkatakannit (tipan ka ishinakuaki ka mamishati utapana) tshetshi tshikuanitet anite 16 SSI (akua ka tutakanit tshetshi eka ishkuatet) tshetshi ut uauitshiaushit mak utamaik nenua ka nakatuenitakaniti atusseuakana anitshenat tshe apashtaht ne tshi ishi-atussenanut.